ශ්‍රී ලාංකේය පාසල් සංගීත අධ්‍යාපනයේ උත්තර භාරතීය සංගීතය සඳහා භාවිත ඉගෙනුම් ඉගැන්වීම් ක්‍රමවේදයේ පවතින ගැටලු හා ඒ සඳහා යෝජිත නව ඉගැන්වීම් ක්‍රමවේද

Abstract

මෙම ලිපියේ ප්‍රධාන අරමුණ වන්නේ ශ්‍රී ලංකාවේ පාසල් සංගීත අධ්‍යාපනය තුළ උත්තර භාරතීය (රාගධාරී/හින්දුස්ථානී) සංගීතය ඉගැන්වීමට භාවිත වන ඉගෙනුම්-ඉගැන්වීම් ක්‍රමවල පවතින ගැටලු හඳුනා ගෙන, ඒ සඳහා යෝජිත ප්‍රායෝගික හා නිර්මාණාත්මක නව ඉගෙනුම් ක්‍රම නිර්දේශ කිරීමයි. ගවේෂණ ක්‍රමවේද ලෙස විෂය නිර්දේශ, ඉගැන්වීම් ක්‍රියාවලීන්, එ‌ෙතිහාසික හා න්‍යායාත්මක සාහිත්‍ය සහ පශ්චාත්-උත්පාදන අභ්‍යාස පිළිබඳ සාලක-විශ්ලේෂණාත්මක අධ්‍යයනයක් සිදු කර ඇත. විශ්ලේෂණයෙන් අනාවරණය වූයේ පාසල් පරිසරයේ විභාග මූලික හා ආකෘතික ඉගැන්වීම්, ගුරු-කේන්ද්‍රීය අධ්‍යාපන රටාව තුළින් නිර්මාණශීලී චින්තනය හා එසැණ නාද නිර්මාණය වර්ධනය නොවීම, ගුරු සම්පත් හිඟය සහ ප්‍රායෝගික පුහුණු අනුපාතයේ අඩුවීම යන ගැටලු ලිපිය පෙන්වයි. යෝජිත නව ක්‍රම ලෙස: (1)ගුරු-මූලික ආදර්ශ දැක්වීමේ හා මග-පෙන්වීම්, (2) ප්‍රායෝගික පුහුණුව ලබාදීම, (3) රාග සංගති, රාග ස්වරූපය, රාග භාවය හා ගමකාලංකාර ප්‍රායෝගිකව හැදෑරීමට ඉඩ සැලසීම සහ (4) විභාග වෙනුවට නිර්මාණාත්මක සංවර්ධන මූලධර්ම ප්‍රවර්ධනය කිරීම අවශ්‍ය බව පැහැදිලි කෙරේ. නිගමනය ලෙස, උත්තර භාරතීය සංගීතය පාසල් මට්ටමේ සාර්ථකව ඉගැන්වීමට විෂය නිර්දේශ සංස්කරණය, ගුරුවරු පුහුණුව වැඩිදියුණු කිරීම හා ප්‍රායෝගික-නිර්මාණාත්මක අධ්‍යාපන ක්‍රම හඳුන්වාදීම අත්‍යවශ්‍යයයි.